Vergaete zulle veer haem neet. Dat is geweun onmeugelik. Zoa wie hae koosj goochele mit weurd, in zien speeches és Prizzedent van "zien" Samewirkende Limburgse Vastelaovesvereniginge (SLV).
Hugo, ein besjtuurder dae mit weinig weurd väöl koosj zègke. Kernweurd es 'humor', 'Vastelaovend' en 'Vastelaovend: 't meist belangrieke van al 't onbelangrieke', dae cachet, sjtiel en aug veur detail belangriek vónj.
Zien leefde veur de Vastelaovend is zeker ontsjtange wie Hugo in 1975 boere-broedegom woort bie d'n Roojse Vastelaovend. Dao haet 't vastelaovesvirus haem sjtevig vasgepak.
Hugo klom al vlot op 't hoagste besjtuurlikke podium van dit Limburgse verbroederingsfeës.Van dao oet kaom hae bie 't SLV besjtuur. Hae woort vice-veurzitter, zoawie hae zelf zag: "de sjoanste functie, want väöl eër és zake good leepe en de meugelikheid óm de veurzitter de sjout te gaeve és d'r get mis ging".
Nao 't wegvalle in 2001 van Wim Leentjens és Prizzedent van de SLV, woort Hugo waarnömmend Prizzedent pès 2004, om later Prizzedent te waere. Dees rol sjpeelde hae mit väöl enthousiasme; in 2009 naom hae aafsjied en woort hae beneumd pès ere-besjtuurslid van de SLV.
Hugo genoot auch altied zichbaar van de momènte, dat hae angere
Vastelaovesvierders zaog genete van de Vastelaovend. Bie de väöle oetreikinge van de Orde van Verdeenste bie de lidvereniginge van de SLV, kaom hae jedere keër good veurbereid veur d'n daag. Hae wis wat d'r lokaal sjpeelde, of zörgde dat hae dees informatie kreeg aangereik, al moosj hae de Vorste of Prizzedente van de vereniging zelf dees informatie óntfutsele. Mit zien humoristische veurdrachte bie de oetreiking van de hoagste Limburgse Vastelaoves ongersjeiding, de Gulden Humor en de Gouden Narrenkap, wis Hugo ummer jederein te boeie, auch veur de neet-Limburgers haw hae zien Esperato-Limburgse versie achter de handj. Neet veur niks dat hae pormoveerde aan de Narren Universiteit Limburg és docterandus Humorus Causa.
Daonaeve koosj Hugo auch genete van de NEG, de Närrische Europäische
Gemeinschaft oftewaal de Europese samewirking van carnavalsbonde. Geneete van
de väöle uutingsvorme van de Vastelaovend in de versjillende lènj en de väöle nuuje vrunj en kontakte die door de SLV woorte gemaak.
Het aafsjied nömme van de SLV is haem ummer zjwaor gevalle; hae waor ével jaorelangk same mit zien angere besjtuurders Marcel Brans, Theo van Mulken, Huub Verstappen en Henk Sprengers kartrèkker van de Limburgse Vastelaovend.
De daag van zien aafsjied van het SLV besjtuur is hae door de Blauw Sjuut in Venray opgehaold óm oppe residentie op Kasjteel Gebrook toegespraoke te waere door väöl
vereniginge mit weurd vol lof en dank veur zien jaorelange inzèt veur de Limburgse Vastelaovend.
Jederein kènt zich nog waal herinnere dat Hugo dèks neet te vènje waor. Dan waor hae bie zien lotgenote, effe tökgetròkke veur ein momènt van rös en tied veur ein sigarètje.
Genetend van zien en ózze Vastelaovend.
Hugo haw ein duudelikke meining euver Vastelaovend en de óntwikkeling van dees Volkskultuur oppe daag van vandaag. In 2007 sjreef hae hie euver mit és titel: "Economisch belang van de Vastelaovend moet aangetoond worden". Hae maakde zich sjterk veur de economische waarde van Vastelaovend: allein zoa kènne veer dit sjtökske Volkskultuur behauwte. Vastelaovend is neet allein mèr feës, mèr zörgt d'r auch veur dat väöl luuj ein botterham kènne verdeene.
Nao zien SLV periode vònj Hugo ein anger meneer óm zien humor kwiet te kènne: hae bleef sjrieve aan gevatte tèkste en klom bie Cirkus Mök és geistelike op ein sokkel om zoa zien humor te blieve oetdrage.
De letste jaore waor Hugo aan de sjlaag gegange mit mozaïek, waobie hae zien kreativiteit op ein angere wies koosj uute. Jeder kunstwèrk mit zien eige verhaol en symboliek. Wie hae krank woort en wis dat hae neet lang meër te laeve haw, maakde hae zien eige gedenksjtein in mozaïek.
Hugo, erebesjtuurslid van de SLV. Haet zien gedachte noats gans kènne losmake van 'zien' SLV. En veer kènne en wille ós gedachte aan unne groate Vastelaovesvrundj auch noats loslaote.
Hugo Stappers, Vastelaovesvierder pur sang, bedank!
Het SLV bestuur:
Raymond Vlecken, Prizzedent
Tenny Tonen, sikkertaris
Frits Dirks, penningmeister
Paul Leenen, ceremoniaris
Peter Hilkens, besjtuurslid
Ad Jongen, besjtuurslid
