Béste Theo en Lizzy,
dochter Pauline en partner Vincent,
‘t Haaj neet völ geschildj of vandaag waas ‘t neet doeërgegânge…
In ‘n interview loos ich det Theo veer breurs hieët en toen Theo geboeëre woeërd zien breurs leever e zusje haaje gewildj en eîne haaj zelfs leever -Mestreeeechs- un peeeeeerd.
Mer good, laot ich beginne mét det ich d’n hieër Theo Bovens ‘echt en persuuënlik’ lieërdje kinne in zien functie as gouverneur vanne provincie Limburg en ich in mien zjuust beneumdje functie as prizzedênt vanne Samewêrkende Limburgse Vastelaovesvereîniginge. Oeës ieërste oeëverlég, same mét BCL-vuuërzitter Jos Hessels, ging oeëver corona enne vastelaovendj. Ve besloeëte um same ’n videoboeëdschap te make di-j opreep um vastelaovendj veilig thoês te veere en as teîken van ongerling verboongenheid eur hoês carnavalesk te verseere. Saoves dacht ich, Theo (det mocht ich al drek zégke) ‘ne feine vênt, no nonsense, ‘ne betrokke besteurder mer vörâl ouch ‘ne fervênte vastelaovendjveerder. (En, zoeë wi-j dékker inne media geschrieëve “Integer tot oppe knoeëk”). Ich krieëg van dieës hoogaangeslage hieëre de opdracht - want gae hetj e communicatieburo – um dao ‘nen opzét vör te make. En as ‘ne gouverneur en ‘ne börgemeîster det vraoge dan dooje det.
Waat Theo neet wist és det ich hem innegang ’n dael vanne doelstélling vanne Samewêrkendje Limburgse Vastelaovesvereîniginge leet uutspraeke:
………vastelaovendj és ’n uting van laevendje volkscultuur en folklore in Limburg en levertj daodoeër ‘n beejdrage aan ’t cultureel en maatschappelik laeve in Limburg……
Zoeë emes mot dan naoteurlik de Orde vanne Gulden Humor kriêge, neet dan?
Dus nao afstemming mét de 17 aodste en groeëtste vastelaovesvereîniginge van Limburg, zégktj mer de SLV, ginge vae ‘m vraoge of hij de Laureaat woeëj acceptieëre:
Lizzy, ekskuzieër det ve mét ‘ne groeëte dillegatie beej dich kwome binne valle, dich haats de schîlders op bezeuk, diene mins woor netjes in ’t pak mer waal oppe sloffe…. Hae dacht dan ouch ‘n ‘Team meeting’ mét Vivianne Heijnen te hebbe en dan kriegse ’n aantal hieëre in sjiek pak mét twieë camaraploge op bezeuk. Gelökkig haaje ve waal ’n fles champagne beej os. Dânke desse aan oeës overvalcomplot mej dieëts. En Theo daaank desse ‘m acceptieërdje.
Um de laudatio (oftewaal lofrede) uut te spraeke oeëver Theo Bovens zien bezûndjer verdeenste és vreej gemaekelik. As dejje noow allemaol eure GSM uut eur tes haaltj en intiktj www.theo bovens.nl zeeje zien CV, de artikele di-j oeëver hem verschieëne zeen inne media, blogs, zelfs eîne over ‘ego’ en foto’s. Rest my case (des Îngels, mer det beteîkentj; ich hoof niks mieër te vertélle.)
Dan zeeje ouch zeen ânger werreldjse en kêrkelike ongerscheî-jinge;
Ridder in de Orde van het Heilig Graf
Ridder in de Orde van Oranje Nassau
Eremedaille in zilver vanne stad Mestreecht
Bronsgroene Leeuw Lieveke
Mer good, det waas dus de kortste laudatio oeëts... Rest my case (des Îngels, mer det beteîkentj; ich hoof niks mieër te vertélle.) Ich dînk det de laudatio van Theo zeen vader Thei langer deurdje wi-j dae de Gulden Humor krieëg in 1986.
‘n Laudatio lichtelik mieër passendj beej oeës doelstélling zoeë as ich di-j gaer verwoeërd: Vastelaovendj in Limburg és dynamisch immateri-ieël erfgood; lidjes, verhaole, dialecte, rituieële, gebroêke en tradities. Dit immateri-ieël erfgood wurtj eders kieër opnow vôrmgegaeve in samehang mét maatschappelike verângeringe en in interactie mét de sociaal umgaeving. ’t Wurtj van ginneratie op ginneratie doeërgegaeve. ’t És de schakel tösse noow, vreuger en towkomst. ’t És cultuur van noow, guftj e geveul van verboongenheid mét vuuërige ginneraties en és tegeliêkertiêd ouch towkomstgerichtj umdet minse ’t WILLE doeërgaeve aan volgendje ginneraties. Immateri-ieël erfgood és ‘ne laevendje en dynamische vôrm van erfgood dae zich aanpasj aan en mej verângertj mét d’n tiêd.
Gelökkig doon vae ‘t mieëste neet digitaal, dus ouch de laudatio neet, maar gaon waal mej mét d’n tiêd.
Uteraard hebbe de 17 aodste en groeëtste vastelaovesvereîniginge van Limburg lang gewiktj en gewoeëge. Gouverneur Emile Roemer vroog dan ouch nao ’t juryrapport. Ich zag tieëgen hem: Ich steur uch ’t beervîltje waal tow, (mieër as d’n achterkânt waas neet noeëdig). Mer alle gekheid op e stekske…
Laudatio
beej gelaegenheid vanne uutreiking vanne Gulden Humor
aan Theo Bovens
De Orde vanne Gulden Humor wurtj sinds 1962 uutgereiktj as dè hoeëgste Limburgse vastelaovendjsorde doeër de Samewêrkendje Limburgse Vastelaovesvereîniginge.
De orde vanne Gulden Humor wurtj towgekindj aan kandidate di-j zich bezûndjer verdeenstelik hebbe gemaaktj vör de bevordering vanne laevesbli-jheid, vör de bevordering vanne de humor en/of de vastelaovendj en ’n groeëte bekindjheid genete inne provincie Limburg.
De motivatie:
- Theo woeërd geboeëre exact 9 maondj later as toen zien vader in 1959 stadspreens woor vanne Tempeleers, vastelaovendj woeërd ‘m dus mét de paplieëpel ingegaeve
- As liêfspreuk: ‘Vastelaovendj és de belangriêkste beejzaak in ’t laeve’
- Ziene wîns tiêdes dieës daag: Vastelaovendj Same: tiêd vör deindânger
- Theo Bovens waas tiêdes zien gouverneurschap ‘ne prominênte beschêrmhieër vanne Limburgse vastelaovendj
- As historicus hechtj hae, en hieëtte waardieëring vör Limburgse tradities en rituieële
- Same mét Theo d’n Twieëdje hieëtte de Limburgse vastelaovendj oppe kaart gezatte mét zien humoristische beschawwinge beej ’t Knoevelemênt in ’t gouvernemênt in Maastreecht
- Daonaeve és hae verboonge as doctor aanne NUL, de aodste (Narre) Universiteit in Limburg, faculteit Theo-logie. ’t Ongerwêrp van studie inne faculteit Theo-logie vanne Narre Universiteit Limburg és of EÎNE Theo zoeëwaal autoriteit as anti-autoriteit kân zeen. De snor (kneêvel) blieftj ’t verbîngendje elemênt van macht en onmacht
- Uutgerope tot ‘Snor van ’t jaor 2023’ in Antwêrpe en daomej de onaafhânkelike republiek Snoravia geredj (FB De Knievel Vaan Theo)
- Jurylid vanne Limburgse Kampioenschappe Zaate Hermeniekes
Daomej hieët Theo Bovens bliêk gegaeve te beschikke oeëver e bezûndjer groeët geveul van humor. Laevesbli-jheid straoltj hae -mét ziene kneevel- zoeë-wi-j-zoeë ederen daâg uut en hae hieët de Limburgse vastelaovendj rojaal oppe Nederlandse kaart gezatte. Det gieëtte voeërtzétte inne Ieërste Kamer in Den Haag. Dus det zitj waal snor!
Dames en hieëre, moog ich uch verzeuke um op te staon en ich vraog ’n oeërverdouvendj applaus vör de laureaat vanne Orde vanne Gulden Humor; d’n hieër Theo Bovens!
Gelaen, 25 november 2023
Bart Maes,
Prizzidênt Samewêrkende Limburgse Vastelaovesvereîniginge
