Vastelaovesvereiniging de Baeker Pottentaote zin de stads-vastelaovesvereiniging van Baek; de poart nao ’t heuvelland. Veer zin opgerich in 1886 en höbbe daon auch in 2006 ôs 11x11 jaorig besjtaon maoge viere. De Pottentaote höbbe zich ès doel gesjtèld de vastelaovend in de breidste zin des woord te promoten in Baek. De Pottentaote zin pioniers op ’t gebied van nuuj dènger bedèngke. Zwao is in Baek ’t idee onstjange van ’t zaate hermeniekes gebeure; ein aktiviteit die momenteel door gans de provinsie Limburg terrök te vènge is. Auch de Leechstoet op vastelaoveszondig is van Baekse komaaf. Deese optoch trök op zondig 20.000 luuj nao ’t Baekse. Momenteel auch alweer her en der euvergenomme! De Baeker Pottentaote ongersjeije zich mit de vastelaovesgroet van alle angere vastelaovesvereiniginge. Sinds 1947 wurt in Baek “Allewiel” gezag en gegroet mit lèngks! Veer nwuèdige Uch gaer oet, ôs site ins te bezeuke! Groetend mit eine Baeker Allewiel!!!

Website: www.pottentaote.nl 

’t Bombakkes uut Génnep is de aldste vastelaovendclup ien de kop van Noord-Limburg. Op inisjatief van d’n toenmaolige Burgemèè.ster wier op 11 Mert 1946 en vereniging opgericht mit as doel de vastelaovendviering ien Gennep naor en högger plan te brenge. Vanaf dén tied is ’t Bombakkes nie mér uut Génnep weg te di.nke. Téggeworrig bestet ’t Bombakkes uut ongevèèr 20 lééje (Raod van Ellef en Bestuur), engevuld dör zun 450 “Compaene”; mi.nse die de Génnepse Vastelaovend en wé.rm hart toedrage en allemôl op hun manier en steentje bïjdrage ân enne goeie vastelaovendviering. ’t Bombakkes kent ôk nog enne èège vastelaovendgroet in pléts van ‘t “(Kölle) Alaaf”. De Vorst of de Prins sluut ziene toespraak mèèstal af mit: ’t Krölt ‘r!, waorop de toeheurders antwoorden mit “Moel Moel”. Want mït de vastelaovend kan ‘t ‘r é.cht kröllie ien Génnep, en ’t zal d’r nog lang blie.ve krölle! Moel Moel!

Website: www.bombakkes.nl 

De Karnavals Vereniging Burgerlust (K.V.B.) is opgerig in 1924. In deë tied vierde de mijnbouw zing hoogtijdaag i Egelse. De naam “Burgerlust” is in Zuud-Limburg uniek. Zigger in de karnavalsweld kunst du deë naam nurgen teage.  De naam “Burgerlust” weëd voornamelijk geassocieerd mit de lust va de burger. Het zou och lust vuur de burger kunne zië. De egelser karnavalsvierders weade och ‘Vottekletsjers’ geneumd. dizze benaming is aafgeleid va de ‘vot’ va de beum (boomstronk).  De K.V. Burgerlust hat als doel ‘t karnavalsgebeuren in het durp tse sjtimuleren, tse organiseren en tse begeleiden. Heivuur weade versjillende activiteiten ontwikkeld zoeals bijv. het jaorlichse proclamere va inne prins en inne jeugdprins, ‘t organiseren va de Herrenzietsoeng, de Jeugdmiddag, de Seniorenkarnaval, ‘t i sjtand hoade va de Auw Wieverbal, de Prinsenreceptie en de drei dolle Karnavalsdaag.

Website www.burgerlust.nl 

D’r Kirchröatsjer Vasteloavends Verain “ Alaaf Kirchroa 1936 “, is van 1936 aaf d’r sjtadsvasteloavends verain va Kirchroa. D’r Road van Elf, d’r vuursjtand van d’r verain, sjtelt d’r Sjtadsprins va Kirchroa, deë aavangs jannewaar óp d’r Maat weëd oesjeróffe. Vuurdat de drei dol daag aavange kan me ziech ópwerme óp de damezietsóng. herezietsóng , kingerzietsóng, vetdonnesjdiegzietsóng en jalazietsóng, woa óch de bekankde Kirchröadsjer büttereedner óptreëne. D’r zamsdieg vuur de vasteloavend d’r kingeróptsóg en dan de vasteloavendsdaag, mit óp vasteloavendsmondieg d’r jroeëse tsóg en óp vasteloavendsdeesdieg klonetrekke, dan truft me ziech i Kirchroa: ’t sjuntse óp de welt wat d’r Herjod hat jemaad, is Kirchroa dat zingt en laacht.

Website: www.kvv1936.nl   

De georganiseerde vastelaovend in Meersje dateert oet 't jaor 1950. In dat jaor woort de vereiniging 'De Aanhawwersj' opgerich, noe de awdste  vastelaovesvereiniging in Meersje. De vastelaovesgezèt 'de Sjampsjeut' dateert oet 't jaor 1957 en weurt nog jaorliks ein week veur de vastelaovend oettgegeve. De keengeroptoch trèkt op vriedig en weurt georganiseerd in samewèrking met de basisjwalle. Op de zoondigt trèkke de Aanhawwersj verkleid door Meersje. Op maondig is de Grwatte Optoch en sinds ènkele jaore vingk op de deensdig de Top 111 plaats op de Mêrret in Meersje. De Aanhawwersj sjinke väöl aandach aan de awwerluuj en krankeluuj die neet mie kènne deilneume aan 't vastelaovesgebäöre. Zie doon dit door de jaorlikse seniorezitting te organisere en de zieke te bezeuke thoes, in de ziekehoezer en verpleegklinieke. Symbool veur de vastelaovend in Meersje is de Pie: de vastelaovesgeis van Meersje. De Pie is verwèrrik in de scepter van de Prins en in de sirremoniesjtek van ooze sirremoniemeister.

Website: www.cvdeaanhawwersj.nl

De Mestreechter Stadsvastelaovendsvereiniging De Tempeleers is oontstande oet de Sjósseteit Momus (1839-1939) die gein oetgesproke carnavalsvereineging waor. Op 16 November 1945 woord euver gegaange tot de stiechting vaan de Mestreechter Vastelaovendsvereiniging, dee es naom geit voere : "De Tempeleers”, umtot de vereiniging zitting heet in de awwe Momustempel en neet kin leve zoonder e flink glaas beer. Tot lid vaan de vereiniging kin touwtrejje: “ elke vastelaovendsgek, joonk of aajt, riek of errem.” De Tempeleers anno 2010 organisere es Stadsvastel-aovendsvereiniging de optochte (de groete- en kinderoptoch), zittinge (Kaffee de Zeuten Inval en de Vastelaovendszitting op Klevarie), ’t Gala Prinsebal, ’t Jäögprinsetreffe Mestreech, ’t Groet Mestreechs Verkleidersfies: ‘De Nostallegasie’, ’t Vastelaovendskonzèr door ’t LSO, Carnavalogie op Mestreechter sjaole, ’t Zate Hermeniekes-concours op ’t Vriethof, de Kinderkestuumwedstrijd en edere daag van de Vastelaovend trèk de Cramignon vaanaof de Merret in Mestreech. Mer belaankriek is toch in ’t Vijfde sezoen de drei Vastelaovendsdaog. e Fies vaan betrèkkelekheid, boe rang en stand vervalle en boe veer us same, joonk en aajd, kinne ammezere. e Fies boeste evekes de zörg vaan allendaag kins vergete en d’ch same mèt ederein deeste leef höbs dedoor goejs.

Website: www.tempeleers.nl

Op 22 oktober 1936 is de besjlissing genaome om weer ein Vastelaovesvereniging op te richte in de sjtad Remunj. Op 11-11-1936 was de oprichting van D’n Uul ein feit. Het vastelaovesleed van det eerste jaor is toet op de daag van noe de herkinningsmelodie van de vereniging: “D’n Uul dae reup Oehoe!” D’n Uul is van vreuger oet en nog sjteeds ein broesende vereniging, die sinoniem sjteit veur “de vastelaovend in Remunj op ein Uulwaerdige wies”. De vereiniging telt zo’n 600 leje en is daomit ein van de grótste in Remunj. Aktivitiete wie Bóntje Aovende, Sjtasiefestasie, Lachenderwies, ’t Verkesbal en de Aad Prinse Klub, ‘t Aad Adjudante Syndikaat en ein Oettrekkend Gezelsjap van zo’n 90 persone zeen neet allein in Remunj, maar in de ganse provinsie en wiet dao boete bekind.

Website: www.dn-uul.nl

De vastelaovend in Gelaen is ’n verhaol apaart. Gelaen zelf, óntsjtange oet ’n aantal gehuchte tössje Baek en Zitterd, greujde dank zij de kaole-industrie oet tot ’n welvarende sjtad. Óm de rös ónger de arbeidersbevolking te behawte, waore de notabele en geistelikke jaorelangk taenge vastelaovend in Gelaen. Totdat de óngernömmers in Gelaen zaoge dat de luuj dan vastelaovend ginge viere in anger plaatsje. Dat waor ’t moment – november 1947 – dat vanoet de keigelklup Rollend Vermaak Sjtadsvastelaovesvereniging De Flaarisse woort opgerich. De Flaarisse höbbe direk de naam Gelaen ómgeduip in Waereldsjtad en de vastelaovend  breid neergezat: optochte, zittinge en anger  aktiviteite zeen bienao allemaol in de beginjaore al georganiseerd. ’t Symbool van de Flaarisse is de Aafgebrende Gaaskaetel. Dit is aafgeleid van ’n waorgebeurde brandj in de enorme gaashawter van de koel, nao besjeetinge in d’n aorlog. De Flaarisse en Gelaen höbbe dèks veurop geloupe es ’t geit óm initiatieve óm de vastelaovend in Limburg good te organisere. Zoa is ouch ’t LVK in Gelaen óntsjtange. In de Waereldsjtad gaon veer de Flaarinnekes en Flaarisse veur mèt ’t motto: ‘Tot ónger ’t kroed, Gelaen veuroet!’

Website:  www.flaarisse.nl 

Zaoterdig 11 fibrewarie 1961, Vastelaoveszaoterdig ! Limburg gaet weer oet zien daak, d'r vastelaovend is begòs. Vanaaf noe haat aoch Gebrook zien vastelaovesveraeniging: 't Comité Carnavalsviering Hoensbroek, aafgekort es CCH. Allewiele neet mieë weg te dinken i de Limburgse vastelaoveswelt. 'n Veraeniging die jieëker jaor opnuuj weer zörgt vuuër 'ne sjoeëne, kluërrieke vastelaovend mit wageboewesj, einzelgänger en groepe, dae top is i Limburg. Mit jaorliks sjitterende evenementen en optochte vuuër jòngk en auwd, mit es Residentie Kesjtieël Gebrook, woe aoch de SLV resideert. CCH, 'n vastelaovesveraeniging die juus wiej de anger veraeniginge i Gebrook midden i de gemaensjap sjtaet. Wilt gier mieë uëver òs waete:

Website: www.cch-gebrook.nl

Venloosch Vastelaoves Gezelschap Jocus, sinds 6 oktober 1842, is de aldste vastelaovesvereiniging van Nederland. Op vandaag is Jocus ein neet mier weg te dinke instituut in de Venlosche Vastelaovend en wied dao boete. ’t Jocus leedje ‘ElfvanElf’ oet 1935 guf in ein paar wäörd aan wao Jocus veur steit: ‘Riek en erm, jônk en ald, sluut zich aan mit eur faan beej ôzze Jocus Haan’. Dit bepaolt ’t dagelikse doon en laote van idder Jocus lid, veurgegaon door Vors Joeccius XI en ziene wieze Raod. Alles in ein passende ambiance en de tradisjonele sjiek huurende beej ’t theater van Klatergold en Parelwien, bewaak door ôs totembiës D’n Haan, mit zien wieze laevesspreuk, veur ’t laeve oetgeliënd aan Vors Joeccius XI, “Jocus Vitae Quod Sal Coenae”. 

Website: www.jocus.nl   

De Sjtadsvastelaovesvereiniging De Marotte Zitterd besjteit onaafgebraoke saer 1881, dat kènt geine angere zègke. Ós liefsjpreuk is:  M.P.Q.S. oftewaal De Marotte en ’t volk van Zitterd. Veer kènne ein paar apaarte vastelaovestradities: De Sjtadsprins mót óngetrouwd zeen, en wurt nao oetruiping neit direk geinsjtalleierd, dao zitte mee  waeke tössje. Hae wurt dan op ludieke maneier door zien vereiniginge en vrunj aan De Marotte euvergedrage. De zóndig veur de vastelaovesdaag trèk in Zitterd de kènjeroptoch . En op Vastelaovesdaensdig sjmiete veer Appelsiene.  Mit Vastelaovend hawte veer oppe Mert de Vastel-aoves-6 daagse: aktiviteite  van dónderdig pès daensdig. ’t Liefblaad van de Marotte, de Pappegey,  besjteit ouch al saer 1881. Ouch nog ’t vermelje waerd is dat het nuut Zittesj vastelaovesleidje al oppe lèste zaoterdig van augustus (Kirmèszaoterdig) es eesjte in Limburg gekaoze wurt.

Website:  www.marotte.nl   

 De Vastelaovessoosjeteit ‘De Mirlitophile’ ies in 1879 opgeriech en onaafgebraoke aktief gewaes in ’t vastelaovesgebeure. In 1881 haet de Mirlitophile ein hoeskamer ingeriech en ingewiejd in de Gemeintegrot: ’t Panthéon geheisje en door gans Limburg bekind. Zie organiseerde toen al ‘ne optoch onder de naam kortaesj. In de aanvangspirrejode van de ‘Mirlitophile’ besjtóng de vereiniging loeter oet de ‘Raod van Èlf’, óndersjteund door de Senaat. In de zestiger jaore van de twintigste ièw sjtonge de Karnevaliste aan de weeg van de Oud Prinse en Ministersj-Soosjeteit en vóng ’t ièrsjte Oud Wieverbal plaats. In de ièrsjte jannewari-waek weurt de Sjtadsprins en Jeugprins, mèt hun sikkendante, de Ministers, oetgerope. In ’t waeking veur de Driej Döl Daag waere allerlei vroleke en sjarritatieve bie-einkómste georganizeerd. Op zaoterdeg is de Vastelaovesdialekmès mèt sjitterende blaosmeziek waornao in ’t sentrum ’t fiès geäöpend weurt mèt ’t inblaoze door 11 Zate Hermeniekes. Op Karnevalszóndegmörge vingk op ’t Gemeintehoes de Sjleuteleuverdrach plaats. Dat weurt besjlaote mèt ’t Bokvore bie kesjtièl ‘D’n Halder’, waornao de Jeugoptoch trèk. Op maondeg trèk de groaten optoch oet en dan ies Vallekeberg aan de Geul prezent mèt alle in de gemeinte lieggende dörper ‘s Deensdesaoves trèk de Lempkesoptoch door ’t hiestories sentrum van de Geulsjtad. Haufvaste weurt ’t portrèt van de Sjtadsprins ònthöld in ’t Panthéon.

Website:www.mirlitophile.nl

 Vg. D’n Oeles sjtelt zich al bijna 60 jaor – op 25 september 1951 is de vereiniging opgerich – toét doel ut kulturele erfgood van d’n Tegelse vastelaovend in sjtand te haaje , te bevordere en deils te organisere. Ôs gezelsjap haet de iër um jidder jaor ein niej prinselik trio aan de Tegelse bevolking te meuge prizzentere. Tiéjes ’t viéfde sezoen drage weej de vastelaovend oét nao jôngk en aad en waere ouch de bejaarde en kranke minse zeker neet vergaete. Gruëts zeen weej op ôzze kleurriéken optôch dae op vastelaovesmaondaag, met ein groét aantal deilnimmers , door ut Oelesriék trek. Al dees en vuël angere aktiviteite organisere weej ônger ut motto: ” Umdet Tegele ôs leef is “

Website: www.oeles.nl 

Waor anders dan op de zandgroond tusse de Maas en de Pieël kan v.v. de Piëlhaas tuus zien? Opgericht ien 1939, waornao de Piëlhaas uutgräöjde tot ‘n vereniging die verankerd is ien hieël de Venrojse gemaenschap. Beroemd zien de zittingsaovende die Circus Mök hiete, mit ‘n pieste as buun. Umdat die van v.v. de Piëlhaas van wied en nog wieër komme, bieje zeej beej de Gulden Humor ennen (doeëjen) haas an de organisierende vereniging an. Binne de Piëlhaas is ‘n aktieve jeugdvereniging bezig: de Hazekeutel. Onder ‘t motto ‘Blief Wakker’ staeke ze ien Venroj mit de vastelaovend de start ien de locht, hange nie an moeders rök en vergaete ze hunnen zörg en drek.

Website: www.pielhaas.nl

V.V. de Rogstaekers bestiêt uuet ongeveer 30 lede. Dieës Stadsvastelaovundjvereiniging hiêt groeët draagvlak in de gemeinschap. Alle wieërter zöstervereiniginge erkinne de Rogstaekers aszoeëdanig. Bekindje evenemente zeen de Boonte Aovundje en Boonte Wichtermiddege woeë ruuem 4000 bezeûkers eder jaor op aafkaome. Alles in eige beheer en met eige wieërter artieste. De groeëte Rogstaekersoptocht op Vastelaovundjzondîg hiêt groeëte aantrekkingskracht in de regio. Daonaeve zeen ’t Boore Bal op de maondjig twieë waeke vuuer Vastelaovundj én de muzikale  Lindeboom Slaag um de Merrentj op Vastelaovundjdieënzig geweldjig aantrekkelikke festiviteiten. Kortum Vastelaovundj in Wieërt ès un echt volksspektakel met uuetsraoling ver daoboeëte.

Website: www.rogstaekers.nl

Vastelaoves Vereiniging de Steinder Bök, sinds 1938, is de sjtadsvastelaovesvereiniging van Stein. VV de Steinder Bök is t’r dan auch grwétsj op om binnen ’t Steinse mit ozze hooglustighede en de wieze Road same de vastelaovend te viere mit ozze Steinder zustervereiniginge. Veer hubbe dan auch oos liefsjpreuk: Drie daag lang is er geine tied veur mediciene, veur stress. In de vasteloavendstied omhelzen ver de wermte van de zon, de wiesheid van ouwe van daage. ’t Is ’t fjes van bevrijding. Geneet ter allemoal van. Vastelaovend vierste same. Alaaf.

Website: www.vvdesteinderbok.nl

Óp d’r 3e november 1947 woeëde “De Winkbülle” ópgerich durch inkele lede va de “Heerlense Rij- en Jachtvereniging”.  D’r naam Winkbülle woeëd gekoaze umdat  de lüj van ’t sjieke sjtedje  Heële al god wit wielang zoeë geneumd woeëde. De ieësjte Winkbülle rópde neet  “Alaaf, Alaaf” mar balkde tezame mit hun woapedeer “Aojoa, Aojoa”.D’r lachende eëzel woeëd óntwórpedurch d’r Cor Driessen en is bis hüj ’t  weltbekinde symbool va de Winkbülle geblieëve, Vier zin evvel aan de woorheedsgetruie besjrieving  in de anale  verplich dat v’r hei oetlegke, dat lang vuurdat de Winkbülle as verein ’t leëvesleeg zoge, de lede va d’r ieëder geneumde peëdskloep alverrekde good woare in ’t viere va d’r vasteloavend. Die houwe al inne ege Road van Elf en inne Prins, Lei d’r Ieësjte. Deë hat evvel –  zoeë gauw wie de Winkbülle actief woeëde – zieng prinsemutsj aafgezat en zieng Hoeëglustigheed Louis van Wersch d’r ier gegeëve, deë doamit d’r ieësjte offesjele Winkbülle-prins woeëd en dus doarum óch regeerde as Louis d’r Ieësjte. En zoeë zint de Winkbülle dan hun verenigingsleéve begós. 

Website: www.winkbulle.nl